ဒုက္ခသည် ဈေးတနေ့

ဒုက္ခသည် ဈေးတနေ့

လူဗိုလ်

(တစ်)

အဖိုးကြီးထထ၊ ဒီနေ့ဈေးနေ့လေ ကျမထမင်းချက်ထားလိုက်မယ်။

ကလေးတွေ ကျောင်းတက်အမှီ စားသွားလို့ရအောင်၊ အမြန်လည်းပြန်ခဲ့အုံးနော်

ဟုတ်ပ ဒီနေ့ သောကြာနေ့ ဆိုတော့ဈေးနေ့။ ပြီးခဲ့တဲ့ တင်္နလာနေ့နဲ့ ဗုဒ္ဓဟူး ဈေးနေ့တွေမှာ ဈေးမသွားဖြစ်ခဲ့။ ဒါကြောင့်ဒီနေ့တော့ သွားကိုသွားတော့မှ … ပြောမယ့်သာပြောရတာပါ။ တခါတခါလည်း နှစ်ပတ်သုံးပတ်အထိကို ဈေးမသွားနိုင်တဲ့ အခါလည်းရှိပါတယ်။ ရှိတော့ရှိတယ် များတယ်လို့တောင် ပြောရမလိုလို၊ အိမ်ရှေ့ မျက်စောင်းထိုးမှာရှိတဲ့ ကုန်စိမ်းဆိုင်လေးက ချဉ်ပေါင်ရွက် ၅ဘတ်ဖိုးလောက်၊ ကန်စွန်းရွက် ၅ဘတ်ဖိုးလောက်နဲ့ ပြီးသွားရတဲ့ရက်တွေကလည်းအများကြီး။

အခုဟာကလည်း ငွေယားလေးရှိလာလို့ လို့ ပြောရမှာပဲ။ နော်ဝေ ကိုမကြာခင်ကမှ ထွက်သွားတဲ့ ကိုနွေအောင်က ကလေးတွေကို သင်္ကြန်မှာသုံးနိုင်ဖို့ အတွက်ဆိုပြီး ရင်းနှီးရာ တအိမ်တအိမ်ကို ဘတ်၅၀၀ စီပို့လိုက်လို့ ကလေးတွေ စကေးထဲက ကပ်သုံးရမှာ ကလေးတွေကတော့ မသိရှာကြပါဘူး။ တယောက်ကို ၂၀ တန်တရွက်စီနဲ့ သင်္ကြန် သေနတ်လေးတွေ ဝယ်ပေးလိုက်လို့ ပျော်နေကြပြီ။ ဒုက္ခသည်စခန်းမှာကလည်း တတိယနိုင်ငံတခုခုကို ထွက်သွားတဲ့ လူတွေ ပြန်ကြင်နာနိုင်မှ အူစိုကြရတာ။

တချို့ဒုက္ခသည်တွေကတော့ တတိယနိုင်ငံတွေမှာ ဆွေမျိုးအရင်းအချာတွေရှိကြလို့ ငွေကို အလျှံအပယ် သုံးနိုင်ကြတယ်။ ဒုက္ခသည်စခန်းထဲမှာ ငွေထုတ်ပိုက်ပြီး ဝင်လာကြသူတွေနဲ့ နိုင်ငံခြားမှာ ဆွေမျိုးရှိတဲ့လူတွေက အခွင့်ထူးခံလူတန်းစားတစ်ရပ် ၊ သူများကောင်းစားတာမနာလိုလို့ ပြောခဲ့တယ် အထင်ရှိခဲ့မယ်ဆိုရင်လည့်း လွတ်ခွင့်ဗျာ။ ကျနော်တို့ ရောက်စ ၂၀၀၆ခုနှစ် လောက်ကဆို မီးသွေးတအိတ်မှ ၃၅ဘတ်ထဲ။ အခုတအိတ် ၆၀ - ၇၀ ဖြစ်သွားပြီ။ အဲဒီလူတန်းစားတွေ လက်ချက်ပေါ့။ အိမ်အရောက်သာ လာပို့ပေး ၅၀ပေးမယ်၊ ၆၀ပေးမယ်နဲ့ လုပ်ကြရာက ဖြစ်သွားတာ။ ဝက်သားဆိုလည်း အရင်ကတကီလိုမှ ၅၀ ပဲ။ အရိုး၊ အသား၊ အဆီ မျှပြီးပါတယ်။ အခုတော့အသားချည်း သက်သက်ဆို ၁၀၀ ဖြစ်သွားပြီဗျ။ အသားကောင်းကောင်းပဲပေးနော် ဈေးပိုပေးမယ် ဈေးပိုပေးမယ်နဲ့ ဈေးဖျက်လိုက်ကြတာပေါ့။ ခုဆို အရိုးချည်းသက်သက်တောင် တကီလို ၅၀ ဖြစ်ကုန်ပြီလေ။

ဆွေမျိုးမရှိကြပေမယ့် ခင်ရာမင်ရာတွေက လှမ်းပို့ပေးတဲ့ လူတွေလည်းရှိကြပါတယ်။ တူရာတူရာ အစုအဖွဲ့ လေးတွေအလိုက်လေ။ ဥပမာ- နိုင်ငံရေးသမားချင်း တူကြတာမျိုးလိုပေါ့။ ဒီလိုမျိုးအစုအဖွဲ့လေးတွေက ကျနော်တို့ နို့ဖိုးစခန်ဲးမှာက အများသား။ အဖွဲ့အစည်းသဘောအရဆိုရင် NLD တို့ ABSDF တို့ နိုင်ငံရေးအကျဉ်းသားသမဂ္ဂတို့ မျိုးချစ်စစ်သည်ဟောင်းအဖွဲ့ တို့လိုမျိုး၊ တိုင်းရင်းသားအရဆိုရင်လည်း ရခိုင်လူမျိုး၊ မွန်လူမျိုး ၊ ချင်းလူမျိုး၊ ကချင်လူမျိုး စသည်ဖြင့် အချင်းချင်းပြန်ကူညီကြတာလေးတွေက ကြည်နူးစရာပီတိဖြစ်စရာ။ ပုံမှန်တောင်းကြ ပို့ကြတာလေးတွေရှိကြသလို အရေးပေါ်အခြေအနေတွေအရ ကလေးမွေးခါနီးလို့ နေမကောင်းလို့ ဘာအခမ်းအနား ညာပွဲတော်ရှိလို့ စသဖြင့် တွေလည်းရှိတတ်ကြသေးတယ်။

ဒီလိုပြန်ပြန်ပြီးကူညီကြတဲ့အထဲမှာ တောင်းစရာကိုမလိုဘဲ အလိုက်တသိ ကူညီတတ်တဲ့ ထူးထူးခြားခြားအဖွဲ့တဖွဲ့လည်းရှိလေရဲ့။ ယမကာလုလင်ဆိုတဲ့အဖွဲ့ပေါ့ဗျာ။ သူတို့ အဖွဲ့ကတော့ တကယ့်နယ်ခြားမဲ့ပဲ။ သူတို့မှာဘာတံဆိပ်၊ ဘာအလံမှလည်ှး မရှိဘူး။ သောက်ဖူးသူချင်းဆိုရပြီ။ သူတို့နဲ့ ပတ်သတ်ပြီး အိမ်ရှင်မတွေဆီက လျှံထွက်လာတဲ့ စကားရှိတယ်လေ။ ဘာတဲ့…

ရှင်တို့ နိုင်ငံရေးသမားတွေထက် အရက်သမားတွေကမှ သံယောဇဉ်တို့၊ သစ္စာတို့ ပိုရှိကြသေးတယ်။ လက်တွေ့ပဲ အာနဲ့မဟုတ်ဘူး။ သူတို့အချင်းချင်းက ဖုန်းဆက်စရာတောင်မလိုဘူး။ ဘယ်သူကို ဘယ်လောက်ဆိုတဲ့ စာရင်းနဲ့ အိမ်အရောက် စီစဉ်ပြီး ပို့ပေးကြတာ။ ရှင်တို့ ရဲဘော်ရဲဘက် ဆိုသူတွေကတော့ ဖုန်းနံပါတ် လျှို့ဝှက်ထားရတာတို့ ဖုန်းဆက်ရင်မကိုင်ချင်တာတို့ ကလေးတွေကို ကိုင်ခိုင်းပြီး မရှိဘူးလို့ပြောခိုင်းတာတို့နဲ့ ။ ဖုန်းရပြန်တော့လည်း အဆင်ပြေရဲ့လား အဆင်ပြေရဲ့လား မေးမေးနေသေးတယ်။ ဖြစ်မှဖြစ်ရလေတော်။ ဒီဒုက္ခသည်စခန်းမှာ တဝနေပြီးမှ ထွက်သွားကြတဲ့လူတွေကများ အဆင်ပြေကြရဲ့လားတဲ့ မေးရက်ကြတယ်ရှင်။ ဪ… ဪ… ။ အံ့ပါ့။

(နှစ်)

ဟောဒီမှာ အမဲသား အသားကောင်းကောင်းလေးတွေ ရမယ်နော်…

အမဲသားဆိုပေမယ့် ဒီကအမဲသားက အတန်းအစားတွေက အများသား။ မိုးခိုသားတို့၊ အသည်းတို့၊ ပေါင်သားတို့၊ ကလီစာတို့ကနေ ခေါင်း၊ အမြီး၊ အရိုးပေါင်းစုံနဲ့ အရိအရွဲအစုံရှိတယ်။ နွားတကောင်လုံးက အမွေးတို့ ချိုတို့နဲ့ ခွာတွေပဲ ဆိုင်ပေါ် တင်ရောင်းတာ မတွေ့ရမှာ။ ဈေးနေ့ ဈေးနေ့ဆို အမဲသားဆိုင်နားမှာ ထိုင်ထိုင်ပြီးတော့လေ ဒုက္ခသည်တွေထဲက ဘယ်သူ ဘယ်အဆင့်ဆိုတာကို စစ်တမ်းကောက်လို့ ရနိုင်တယ် သိလား။ တချို့ဆို ဆိုင်ရှေ့ရောက်တာနဲ့ မိုးခိုသားအပုံကို လက်ညှိုးထိုး၊ ရာတန်နှစ်ရွက်ကိုပစ်ချပေးလိုက်ပြီး လက်လေး ၂ ချောင်းပဲထောက်ပြလိုက်တယ်။ မျက်နှာကလည်းခပ်မော့မော့ ခပ်တင်းတင်းနဲ့ ။ တချို့ကြပြန်တော့လည်း အသားတို့ ကလီစာတို့ ထားတဲ့ဘက်ကိုတောင် မကြည့်နိုင်အား အရိုးတထောင် ထောင်နဲ့ အပုံဘက်က နံရိုးတွေကိုကိုင်ကြည့်လိုက်၊ ဒူးဆစ်ရိုးတွေကို ကိုင်ကြည့်လိုက်နဲ့ တော်တော်နဲ့ကို မဝယ်ဖြစ်ဖူး။ တအောင့်လောက်ကြာတော့မှ ဒီအထဲက ၂၀ ဖိုးလောက်ရောင်းပေးပါဆိုတဲ့ ဖျော့တော့တော့ လေသံမျိူးကိုကြားရလိမ့်မယ်။

ကျနော်က ဈေးတစ်ခါတခါဝယ်ရင် စခန်းအဝင်ဂိတ်နဲ့ UN ရုံးနားအထိ ဈေးအစအဆုံးကို အနည်းဆုံး သုံးလေးခေါက်လောက် လျှောက်ဖြစ်တယ်။ ဒီလို ဈေးဝယ်ရတဲ့အလုပ်က ဒုက္ခသည်စခန်းထဲမှာ နေနေသမျှ ဦးနှောက် အစားရဆုံး အချိန်လို့တောင် ပြောရမယ်ထင်တယ်။ ပါလာတဲ့ပိုက်ဆံလေးနဲ့ ဟာမိုနီဖြစ်အောင် ဘယ်ဟာကို ဘယ်လောက်ဖိုး ဝယ်ရမယ်ဆိုတာစဉ်းစားရတာကိုက အနုပညာပဲ။

ဦးနှောက်ချည်းပဲလားဆိုတော့ မဟုတ်ရပါဘူးဗျာ။ ခြေထောက်တွေကိုလည်း လိုရင်လိုသလောက် အနှေးအမြန်ချိန်ပြီး လျှောက်နေရတယ်။ ဈေးဝယ်ချင်းတိုက်မိမှာ ဈေးသည်နဲ့ တိုက်မိမှာ အပြင် ဈေးကား၊ ဈေးတွန်းလှည်း၊ ဆိုင်ကယ်နဲ့ စက်ဘီးတွေကိုလည်း ရှောင်ရဖယ်ပေးရသေးတယ်။ မျက်လုံးနှစ်လုံးကလည်း ကိုယ်လိုချင်တာလေးတွေ ကျော်မသွားရအောင် မကျန်ခဲ့ရအောင် လမ်းဘေး ဝဲ၊ ယာ နှစ်ဖက်ကို မပြတ်အာရုံစိုက်ထားရတယ်။ ထူးထူးခြားခြား ဘာလေးတွေများတွေ့မလဲပေါ့။ ဥပမာ ဈေးပေါပေါနဲ့ များများရမယ့် ကိုက်မဲ့ ဟာမျိုး။

တခါတခါ စခန်းနဲ့ အနီးအနားရွာတွေက လာရောင်းကြတဲ့အသီးအရွက်တွေက လတ်ဆတ်တဲ့အပြင် ဈေးလည်းတော်ကြတယ်။ စားလို့လည်းပိုကောင်းတယ်။ ကြာကြာ အထားလည်းခံတယ်လေ။ မြို့ကနေလာရောင်းတဲ့ အသီးအရွက်တွေက မြေဩဇာတွေ ဆေးတွေသုံးထားတာများလို့ဖြစ်မယ်။ ကြာကြာအထားမခံဘူး။ ခဏလေးနဲ့ ရိ ပုပ်ပြီး အနံ့ထွက်လာတတ်တယ်။ စားလို့လည်းသိပ်အရသာမရှိဘူး။

ဈေးဝယ်ရင် နားကိုလည်းအလုပ်ပေးထားရတယ်ဗျ။

ကဲ … ကဲ … ကုန်တော့မယ်နော် … တကီလို တဆယ်ထဲနဲ့ပဲယူသွား ဆိုတဲ့ အသံမျိုးကိုလည်း ဂရုစိုက်ရသေးတယ်။ ကုန်ခါနီးပြီဆို ဈေးတော်တတ်တယ်လေ။ ဈေးသည်ရဲ့အသံကိုချည်း မဟုတ်ဘူး။ ဈေးဝယ်အချင်းချင်းရဲ့ အသံတွေကိုလည်း အမှုမဲ့ အမှတ်မဲ့ ထားလို့ မရဘူးနော်။

အမရေ … အောစော်ရုံးရှေ့က ရှမ်းမဆိုင်မှာလေ ခရမ်းချဉ်သီးတွေတန်မှတန် ၃ ကီလိုမှ အစိတ်ထဲရယ်

ဂိတ်ဝနားက ကရင်မကြီးဆီမှာ သံပုရာသီး နှစ်လုံး ၁ဘတ်တဲ့ မြန်မြန်သွားဝယ်နော် ဟိုမှာလုဝယ်နေကြတာ အောင်မလေး အလကားပေးနေသလိုပဲ…

ဟိုးဈေးကားပေါ်က ဝယ်လာတာတော်ရေ့ … သင်္ဘောသီးမှည့်တွေ ရွှေဖရုံသီးတွေလည်းပါတယ်။ ဈေးချိုမှချိုပဲ။

ဒီအသံတွေက မင်္ဂလာသံတွေလေ။ ဒီအသံတွေကြောင့် ပေါချောင်ကောင်းနဲ့ ညားတတ်သလို အိမ်ရောက်ရင်လည်း အဝင်လှပြီး နားပူသက်သာတာပေါ့။ မဟုတ်လို့ကတော့ မသက်သာဘူးသာမှတ်။

အ ပါ့တော် သူများတွေဝယ်လာကြတာ တကီလိုမှ ၁၀ တည်း ရှင့်ကျမှ ၁၅ ဘတ်တောင်ပေးရတယ်ဆိုတော့ သေလိုက် …

ဈေးသွားတယ်ဆိုတာ စတိုးဆိုင်မှာ ပစ္စည်းဝယ်သလိုမျိုးမဟုတ်ဘူးရှင့် တဈေးလုံး လျှောက်ကြည့်နိုင် ရှာနိုင် ဈေးဆစ် နိုင်မှ။ ရှင့်ပုံစံက ပိုက်ဆံ အထပ်လိုက်ကိုင်ပြီး ဈေးဝယ်နည်းမျိုးဆိုတော့ …

ပိုက်ဆံရမယ့် အလုပ်တော့ မလုပ်တတ်ဘဲနဲ့ … စသဖြင့် နိဂုံးမချုပ်တတ်တော့ …

ဟုတ်တော့လည်း အဟုတ်သား။ လောလောဆယ် ဒုက္ခသည်စခန်းမှာက ပြည်တွင်းမှာ ၁၄ နှစ် - ၁၅ နှစ် သင်ခဲ့တဲ့ ပညာတွေနဲ့လည်း လုပ်စားလို့ မရ။ နယ်စပ်တကျော မှာ လေ့လာခဲ့ သင်ခဲ့ရတဲ့ ဒီမိုကရေစီတို့ လူ့အခွင့်အရေးတို့ ဥပဒေစိုးမိုးရေးတို့ဆိုတဲ့ ပညာတွေနဲ့ လည်း လုပ်စားလို့ မရ။ ဂွကျပါ့။

(သုံး)

ကျနော်တို့ မိသားစုကလည်းအခက်သား ။ တယောက်နဲ့တယောက် အကြိုက်က မတူကြဘူး။ လွတ်လပ်စွာ သဘောထားကွဲလွဲခွင့်ဆိုတာကို မြတ်မြတ်နိုးနိုး ယုံကြည်မိပေမယ့် ခုလို အကြပ်အတည်းကာလမှာတော့ ဝန်ထုတ်ဝန်ပိုး ဖြစ်တာအမှန်၊ ဒီတော့ ဈေးတခါတခါလာရင် ကျနော့်မှာ အနည်းဆုံး သုံးမျိုးလောက် ခွဲစဉ်းစားရတယ်။ ကျနော်ကိုယ်တိုင်လာဝယ်တော့ ကျနော့်အကြိုက် ပထမစဉ်းစားမိတာ သဘာဝ ကျပါတယ်နော်။ ကျနော်က ထူးထူးခြားခြားလေးတွေ ကြိုက်တတ်တယ်ဗျ။ အသီးအရွက်ဆိုရင် ခွေးအီးသီး ၊ ခွေးအီးညွန့် ၊ ပိန်းနွယ် ၊ ပိန်းပွင့် ၊ ဆိတ်ဖူးမြစ်နဲ့ ဒရင်ကောက်ညွန့်လိုမျိုး သဘာဝတောထွက်အစာတွေကို ပိုကြိုက်တယ်။

ဝက်သားတို့ အမဲသားတို့ ဆိုရင်လည်း ဦးနှောက်တို့ လျှာတို့ ကလီစာတို့ ပဲကြိုက်တယ်။ ငါးဆိုရင်တော့ ခေါင်းနဲ့ ဝမ်းတွင်းသားဘဲ။ ဒါပေမယ့် ကျနော့် အကြိုက်တွေဝယ်သွားရင် အိမ်ကလူတွေ ဘယ်သူမှ မစားကြတော့ အခက်သား။ တယောက်တည်း စားရတော့လည်း ပျင်းစရာကြီး ။ ဒါကြောင့် ကြိုက်တာလေးတွေ တွေ့ပေမယ့် နောက်ဆုံးဦးစားပေး စာရင်းထဲမှာဘဲထားပြီး ပိုက်ဆံလေးပိုမှ စဉ်းစားရတယ်။

ဒီတော့ တအိမ်သားလုံးစားလို့ ရမယ့် အကြိုက်တူမယ့်ဟာကို အရင်အလှည့်ပေးရပြန်ရော။ ဒါတွေကလည်း ပုံမှန်လိုဖြစ်နေတဲ့ ဈေးပေါပေါ၊ များများရနဲ့ ကြာကြာခံတဲ့ အမျိုးအစားတွေပဲလေ။ ခရမ်းသီး ရွှေဖရုံသီး ဘူးသီး အာလူးနဲ့ ငါး ငါးခြောက်တွေဘဲ ပေါ့။

ကလေး၂ ယောက်က အထူးဦးစားပေးဆိုတော့ သူတို့ ကို ကျော်စဉ်းစားလို့လည်း မရပြန်ဘူး။ သူတို့ ကြိုက်တဲ့ ပုဇွန်လေး ၂ ခစ်လောက်ဖြစ်ဖြစ် ကြက်အသည်းအမြစ်လေး ၂ ခစ်လောက်ဖြစ်ဖြစ်၊ ကြက်ပေါင်လေးတချောင်း နှစ်ချောင်းဖြစ်ဖြစ် ဝယ်ဝယ်ပေးမှ။ ဒါတင်မကဘူးရာသီစာ အသီးအနှံတွေပေါ်လာရင်လည်း ကလေးတွေက စားချင်ကြပြန် ၂ ခစ်လောက်ဖြစ်ဖြစ် ရော။ လိမ္မော်သီးတို့ သရက်သီးတို့ ပြောင်းဖူးတို့ လမ်းမြားသီး၊ မရမ်းသီး တို့ စသဖြင့်ပေါ့ဗျာ ။ မနက်က ဈေးကိုလာခါနီးတောင် သမီးငယ်က နား နားကပ်ပြီး မှာ လိုက်သေးတယ်။

အဖေ … နန်းအိစံတို့ စားတဲ့ ကြက်မောက်သီးလိုမျိုး ဝယ်ခဲ့ပေးနော် တဲ့

(လေး)

ကိုကိုကျော်အဂ္ဂရေ၊ အဖေ ကြက်မောက်သီးတွေ ဝယ်လာတယ်၊

ဝယ်လာတဲ့ ကြက်မောက်သီး ကီလိုဝက်ကို တခါတည်း အကုန်ကျွေးလို့မဖြစ်ဘူး။ သူတို့စားချင်သလောက်သာ အဝကျွေးလို့ကတော့ ဒီမောင်နှမ နှစ်ယောက်ထဲနဲ့ ၃-၄ ကီလို လောက်ကုန်မယ်။ တဝက်ကို ခွဲခြန်ထားပြီး ကျန်တာကို ဝေပေးလိုက်တယ်။ ချန်ထားတဲ့ တဝက်ကိုတော့ ကျောင်းသွားမှ ထည့်ပေးလိုက်ရမယ်။ မုန့်ဖိုးထပ်မကုန်တော့ဖူးပေါ့ဗျာ။

ပြီးတာနဲ့ ဟင်းချက်ဖို့ နေရာယူရပြန်ပါလေရော။ ကလေးတွေ အမေက ထမင်းချက်ထားပြီးပြီမို့ ရုံးမသွားခင်အဝတ်တွေ ကမန်းကတန်း လျှော်နေတယ်။ သူက ARC လို့ ခေါ်တဲ့ ကျန်းမာရေးဌာနတခုမှာ ဝန်ထမ်းလုပ်ပြီး တအိမ်လုံးကို ရှာကျွေးနေတာ။ အိမ်ထောင်ဦးစီးဆိုလည်းဟုတ်ပေါ့၊ ကျနော်က မှီခိုအဆင့် ဖြစ်လာပြီးကတည်းက ကြွင်းကျန်အာဏာလို့ ပြောရမယ်။ သူ မလုပ်တဲ့ တောက်တိုမယ်ရအလုပ် အကုန်လုပ်ရတယ်။ ဒီဖက်နယ်စပ် အမျိုးသမီး အခွင့်အရေး အဖွဲ့တွေ ခေါ်ခေါ်နေတဲ့။ ခေတ်မှီ ယောက်ျား ဆိုတာမျိုးပေါ့ ။

ဝယ်လာတဲ့ငါးကြင်းကို ချက်လို့ရတဲ့ အနေအထားရောက်အောင် ခုတ်ထွင် ရှင်းလင်းလိုက်တယ်။ ဝယ်လာကတည်းက ဗိုက်ဖောင်းဖောင်းကို ရွေးခဲ့တော့ အထဲမှာ ဥတွေပါတယ်လေ။ ဒါက ကလေးတွေအတွက်။ ကျန်တဲ့အသားတွေကို ကျော်ပြီး နောက်အနပ်တွေအတွက် တခုခုနဲ့ရောချက်ဖို့ ချန်ထားရမယ်။ ဒီမနက်စာကိုတော့ ခေါင်းနဲ့ အမြီးကို ချဉ်ပေါင်ရွက်နဲ့ရောပြီး အချဉ်ရည်ချက်မယ်ဗျ။ အယ် … နောက်ပြီး ဗိုက်ထဲက အူတွေကိုလည့်း ဒုက္ခသည် ငါးပိနဲ့ရောပြီး ငါးချေးခါး ချက်မယ်။ တို့ စရာကတော့ ဝယ်လာတဲ့ ခွေးအီးသီး။ ဒီကောင်က အသီးလို့သာပြောတာပါ။ အသီးလိုလို ဥလိုလို နဲ့ စားလိုက်ရင်လဲ ဓညင်းဝက်စားရသလိုလို။ နာမည်ဆိုးပေမယ့် ခံတွင်းတော့အတွေ့သား။ မြန်မာပြည်တုန်းက စားဖူးဖို့ နေနေသာသာ ကြားတောင်မကြားဖူးခဲ့ဘူး။ တတိယနိုင်ငံရောက်ရင်လည်း ဒိပြင်အသီးအရွက်တွေတော့ ရှိချင်ရှိမယ်၊ ဒါမျိုးကို စားရတော့မှာမဟုတ်ဘူး။

ပဲသက်သက်နဲ့ နွှဲခဲ့ရတဲ့ ပြီးခဲ့တဲ့ ရက်တွေထက် ဒီမနက်ထမင်းပွဲကတော့ ခံတွင်းတွေ့ဦးတော့မှာ အသေအချာ … ။

လူဗိုလ် .

၁၈. ၇. ၂၀၀၉ .